ພາຍຫຼັງໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຈັດສົ່ງແຮງງານລາວໄປເຮັດວຽກຢູ່ ສ.ເກົາຫຼີ ໃນວັນທີ 09 ກັນຍາ 2016 ທີ່ນະຄອນຫຼວງວຽງຈັນ. ຈາກນັ້ນກໍໄດ້ມີການກະກຽມຄວາມພ້ອມດ້ານຕ່າງໆ ເຊັ່ນ: ຫ້ອງເຮັດວຽກຂອງຊ່ຽວຊານ, ຫ້ອງສອບເສັງ, ຫ້ອງເກັບຂໍ້ມູນ ພ້ອມທັງຍົກລະດັບຄວາມຮູ້ໃຫ້ພະນັກງານຜູ້ຮັບຜິດຊອບເຂົ້າໃຈກ່ຽວກັບລະບົບການຈັດສົ່ງແຮງງານລາວໄປເຮັດວຽກຢູ່ ສ.ເກົາຫຼີ ແລ້ວກໍປະກາດຮັບສະໝັກຄັດເລືອກເອົາແຮງງານ ຈໍານວນ 2 ຄັ້ງ ມີຜູ້ສາມາດເສັງຜ່ານດ້ານພາສາ ແລະ ທົດສອບທັກສະຄວາມສາມາດຂອງແຮງງານ ຈຳນວນ 67 ຄົນ, ໃນຈໍານວນດັ່ງກ່າວ ມີຜູ້ໃຊ້ແຮງງານຂອງ ສ. ເກົາຫຼີ ມາເຮັດສັນຍາແຮງງານ ຈໍານວນ 35 ຄົນ ແລະ ໄດ້ປະກອບເອກະສານຕ່າງໆ ເປັນທີ່ຮຽບຮ້ອຍແລ້ວ.

ມາໃນວັນທີ 5 ກຸມພາ 2018 ສູນບໍລິການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດສົ່ງແຮງງານລາວໄປເຮັດວຽກຢູ່ ສ.ເກົາຫຼີ ຈຳນວນ 26 ຄົນ (ຊາຍທັງໝົດ) ໃນຂະແໜງອຸດສາຫະກໍາ ເປັນເວລາ 3 ປີ. ຈໍານວນດັ່ງກ່າວແມ່ນໄດ້ຜ່ານການສອບເສັງດ້ານພາສາເກົາຫຼີ ແລະ ທົດສອບດ້ານທັກສະຄວາມສາມາດ.

ພິທີຈັດສົ່ງແຮງງານໄປ ສ. ເກົາຫຼີ ຊຸດທໍາອິດ ເມື່ອວັນທີ 5 ກຸມພາຜ່ານມາ ໄດ້ຈັດຂຶ້ນທີ່ສູນບໍລິ ການຈັດຫາງານ, ກະຊວງແຮງງານ ແລະ ສະຫວັດດີການສັງຄົມ (ຮສສ) ໂດຍການເຂົ້າຮ່ວມຂອງ ທ່ານ ນາງ ອານຸສອນ ຄຳສິງສະຫວັດ ຮັກສາການຫົວໜ້າກົມພັດທະນາສີມືແຮງງານ ແລະ ຈັດຫາງານ, ທ່ານ ຄຳແສນ ເພັດສີສະນະວົງ ຫົວໜ້າສູນບໍລິການຈັດຫາງານ ພ້ອມຄະນະ.

ແຫລ່ງທີ່ມາ: ເສດຖະກິດ-ການຄ້າ

Leave a Reply

This site uses Akismet to reduce spam. Learn how your comment data is processed.