ບາດກ້າວທຳອິດທີ່ ຮສສ ຮ່ວມມືຈັດຕັ້ງປະຕິບັດກົນໄກການສະຫນອງຂໍ້ມູນຜູ້ວ່າງງານ ລົງໃນລະບົບຂໍ້ມູນຂ່າວສານຕະຫຼາດແຮງງານ ແລະ ຈັດຫາງານ.

ເພື່ອຈັດຕັ້ງ-ຜັນຂະຫຍາຍແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ IV (2016-2020) ແລະ ຍຸດທະສາດພັດທະນາວຽກງານແຮງງານ ແລະ ສະຫວັດດີການສັງຄົ( ຮສສ )ໃຫ້ປະກົດຜົນເປັນຈິງເທື່ອລະກ້າວ ; ໂດຍສະເພາະແມ່ນການສ້າງລະບົບຂໍ້ມູນຂ່າວສານຕະຫຼາດແຮງງານເພື່ອຮັບໃຊ້ໃຫ້ແກ່ການສ້າງແຜນ ແລະ ດັດສົມມະຫາພາກດ້ານແຮງງານ ແລະ ເພື່ອປະຕິບັດຕາມແຈ້ງການແນະນຳຂອງລັດທະມົນຕີ ກະຊວງ ຮສສ ສະບັບເລກທີ 0194/ຮສສ ລົງວັນທີ 1/2/2018 ວ່າດ້ວຍການຜັນຂະຫຍາຍເນື້ອໃນຜົນກອງປະຊຸມໂຕະມົນປະຈໍາປີ 2017.

ໃນວັນທີ 14 ກຸມພາ 2018ນີ້, ທີ່ກະຊວງແຮງງານ ແລະ ສະຫວັດດີການສັງຄົມ, ໄດ້ມີພິທີເຊັນບົດບັນທຶກຮ່ວມ ກ່ຽວກັບຈັດຕັ້ງປະຕິບັດກົນໄກການສະໜອງຂໍ້ມູນຜູ້ຫວ່າງງານ ໃນລະບົບຂໍ້ມູນຂ່າວສານຕະຫລາດແຮງງານ, ເຊັນຮ່ວມ ລະຫວ່າງ ຕາງໜ້າກົມພັດທະນາສີມືແຮງງານ ແລະ ຈັດຫາງານ ໂດຍ ທ່ານ ໄທ ແສງອາລຸນ ຮອງກົມພັດທະນາສີມືແຮງງານ ແລະ ຈັດຫາງານ, ທ່ານ ເພັດສະໝອນ ຮອງຫ້ອງການກອງທຶນປະກັນສັງຄົມແຫ່ງຊາດ ແລະ ທ່ານ ບຸນຄຳສີ ຫາລາດ ຮອງສູນບໍລິການຈັດຫາງານ ໂດຍເປັນກຽດເຂົ້າຮ່ວມເປັນສັກຂີພິຍານຂອງ ທ່ານ ບຸນຄົງ ຫຼ້າສຸກັນ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ , ພ້ອມພາກສ່ວນກ່ຽວຂ້ອງເຂົ້າຮ່ວມ .

ດັ່ງນັ້ນກົມພັດທະນາສີມືແຮງງານ ແລະ ຈັດຫາງານ( ພຈງ ) ຈື່ງໄດ້ສ້າງຂໍ້ມູນຂ່າວສານຕະຫຼາດແຮງງານ ເພື່ອໃຫ້ສາມາດເຊື່ອມໂຍງກັບທຸກພາກສວ່ນທີ່ກ່ຽວຂ້ອງໄປແຕ່ລະບາດກ່າວ, ໂດຍສະເພາະນີ້ແມ່ນບາດກ້າວທຳອິດທີ່ພວກເຮົາຈະໄດ້ລົງນາມເຮັດບົດບັນທືກຮ່ວມມືຈັດຕັ້ງປະຕິບັດກົນໄກການສະຫນອງຂໍ້ມູນຜູ້ວ່າງງານ ລົງໃນລະບົບຂໍ້ມູນຂ່າວສານຕະຫຼາດແຮງງານ ແລະ ຈັດຫາງານ, ຫ້ອງການກອງທືນປະຈໍາສັງຄົມແຫ່ງຊາດ ແລະ ສູນບໍລິການຈັດຫາງານ ເພື່ອໃຫ້ແຕ່ລະພາກສວ່ນໄດ້ມີສວ່ນຮ່ວມ ແລະ ເປັນເຈົ້າການໃນການສະຫນອງຂໍ້ມູນຢ່າງເປັນລະບົບ; ເຮັດໃຫ້ກົນໄກການສະຫນອງຂໍ້ມູນຂອງຜູ້ວ່າງງານທີ່ໄດ້ປະກັນຕົນໃນລະບົບປະກັນສັງຄົມ ໄດ້ເຂົ້າສູ່ລະບົບຂ່າວສານຕະຫຼາດແຮງງານໄດ້ທັນເວລາ ,ຖືກຕ້ອງ ແລະ ຊັດເຈນ ; ສູນບໍລິການຈັດຫາງານ ກໍ່ເຮັດຫນ້າທີ່ຂື້ນທະບຽນຜູ້ວ່າງງານ, ແນະນຳການຊອກຫາວຽກເຮັດງານທຳ ແລະ ໃນໄລຍະຂອງການວ່າງງານກໍ່ສາມາດຢັ້ງຢືນການວ່າງງານໃຫ້ເຂົາເຈົ້າໄດ້, ພະແນກ ຮສສ ແຂວງ ຫຼື ຈຸດບໍລິການຈັດຫາງານຂອງແຂວງ ກໍ່ຈະໄດ້ແນະນຳຜູ້ວ່າງງານໄດ້ຊອກວຽກເຮັດງານທຳໄດ້ຢ່າງທັນການ.

ລະບົບຂໍ້ມູນຂ່າວສານຕະຫຼາດແຮງງານ ຈະຊ່ວຍຄຸ້ມຄອງຜູ້ວ່າງງານທີ່ໄດ້ປະກັນຕົນ ຫຼື ເປັນສະມາຊິກປະກັນສັງຄົມ ສາມາດຈ່າຍເງີນອຸດໜູນວ່າງງານໄດ້ຖືກກັບເປົ້າຫມາຍຕົວຈິງທີ່ສຸດ ແລະ ທັງເປັນການເພີ່ມທະວີສັງຄົມໄດ້ເຫັນຄວາມສຳຄັນສາມາດເຂົ້າເຖີງການບໍລິການດ້ານຂໍ້ມູນຂ່າວສານຕະຫຼາດແຮງງານ, ຮູ້ນຳໃຊ້ ແລະ ເຂົ້າເຖີງເວັບໄຊຣ ຂອງລະບົບຖານຂໍ້ມູນຂ່າວສານຕະຫຼາດແຮງງານໄດ້ງ່າຍຂື້ນ ໃນການຊອກຫາວຽກເຮັດງານທຳ ແລະ ການເລືອກຮຽນວິຊາຊີບ ແລະ ພັດທະນາສີມືແຮງງານ ໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ.

ໃນໄລຍະໃກ້ນີ້ ກົມພັດທະນາສີມືແຮງງານ ແລະ ຈັດຫາງານ ກະຊວງ ຮສສ , ກໍ່ຈະໄດ້ສຶບຕໍ່ເຊື່ອມໂຍງລະບົບຕາຫນ່າງຂໍ້ມູນຂ່າວສານຕະຫຼາດແຮງງານຮ່ວມມືກັບກົມກິດຈະການນັກສືກສາ ກະຊວງສືກສາທິການ ແລະ ກິລາ ເພື່ອເປັນເຈົ້າການໃນການຈັດຕັ້ງປະຕິບັດກົນໄກການສະໜອງຂໍ້ມູນຜູ້ຊອກຫາວຽກເຮັດງານທຳ ຫຼື ຂື້ນທະບຽນນັກສືກສາທີ່ຈະເຂົ້າສູ່ຕະຫຼາດແຮງງານໃຫມ່ໂດຍສະເພາະນັກສືກສາທີ່ຮຽນຈົບໃໝ່ຈາກສະຖາບັນການສຶກສາ, ມະຫາວິທະຍາໄລ ທັງພາຍໃນ ແລະ ຕ່າງປະເທດທີ່ກຳລັງຊອກວຽກເຮັດ ລົງໃນລະບົບຂໍ້ມູນຂ່າວສານຕະຫຼາດແຮງງານເພື່ອຊ່ວຍໃຫ້ເຂົາເຈົ້າສາມາດຊອກວຽກເຮັດໄດ້ງ່າຍຂື້ນ./

( ຂ່າວ: ເພັດສະໄໝ, ພາບ: ໜູທອງ )

Leave a Reply

This site uses Akismet to reduce spam. Learn how your comment data is processed.